19 октября 2023. Алтан намарай 2-дохи һарада Буряад Уластамнай түрэл хэлэнэймнай габшагай һара заншалта ёһоороо соносхогдодог юм. Байгша ондо тогтонижоһон хэбээрээ энэ хэмжээ ябуулга үнгэргэгдэнэ. Үргэн энэ хэмжээ ябуулгада Улаан-Үдэ хотын Зүблэлэй һунгамалнууд эдэбхитэйгээр хабаадалсаха гэжэ шиидэбэд.
-Түрэл буряад хэлэеэ, ёһо заншалаа болон соёлоо хүгжөөхэ хэрэгтэ хотын зүбэлэлэй һунгамалнууд
оролсобо. Мүнөө үеын эрхэ байдалда тааруулан медиа-түсэл зохёожо 5 видеоролик бүтээбэбди.
Гэр бүлын заншал сахиһан, залуушуулай талаар, үндэһэн эдеэн болон нааданууд, түрэл хэлэеэ үзэлгэ гэһэн сэдэбээр зураглалнууд буулгагдаа. Нэгэ видеороликто манай һунгамал Денис Егоров басагатаяа хабаадахадаа, заншалта эдеэ шанажа байһанаа харуулаа. Нүгөө 4-н видео-зураглалда мүн лэ һунгамалнууд, үхибүүд оролсоһон байна, — гэжэ Улаан-Үдын һунгамалнуудай Зүблэлэй Түрүүлэгшэ Чимит Бальжинимаев хэлэбэ.
Хүмүүжүүлхы удха шанартай эдэ зураглалнууд Улаан-Үдын һунгамалнуудай Зүблэлэй сахим хуудаһанууд дээрэ толилогдохо.
-Танай дэмжэлтээр манай хэһэн ажал олон нютагаархиднай хараха, үзэхэ аргада хүртэхэ бэзэ гэжэ найданабди. Аяар эртэ хабарһаа эхилжэ хүдэлһэн түсэлнай одоошье нара хараба, — гэжэ зүблэлэй мэдээсэлэй албанай хүтэлбэрилэгшэ Елена Чимбеева дуулгаба.
Буряад хэлэеэ, ёһо заншалаа сахин хүгжөөхэ хэрэгтэ хам оролсожо байһан зондо урмашамаар даа.
-Гансал һайндэрнүүдтэ үндэһэн хубсаһаяа гаргажа үмдэхэ бэшэ харин үдэр бүри үмдэжэ ябадаг болохо һэмди. Аялгаар һайхан буряад хэлээрээ өөһэдөө хоорондоо хөөрэлдэхэ ёһотойбди, — гэжэ Чимит Валерьевич Бальжинимаев һанаашална.