18 декабря 2014. Буряад Уласта, арад зоной дурыень буляаһан хүүгэдэй дуунай дискые гаргахаяа байна. Хүгжэмэй шэнэ түүбэриие "Мүнгэн хонхонууд" студи бэлдэжэ байна. Буряад хэлэ дэлгэрүүлхэ грантын урилдаанай илагшадые шагнаха ёһолол дээрэ 100 мянган түхэригэй баталамжые тус студиин түлөөлэгшэ Ринчинова Сэсэгмаада гардуулһан байна гэжэ UlanMedia мэдээсэлэй агентлигай һурбалжалагша бэешэлэн мэдээсэжэ байна.
Шэнэ дискдэ дуугаа дуулаха дуушадые урилдаанда оролсуулжа шагнаһанай һүүлдэ шэлэхэ юм. Тус дискдэ Ямпилов Бау, Аюшеев Дандар, Батуев Жэгжэд, Цырендашиев Базар, Андреев Анатолий, Дамиранов Найдан, Дашипылов Гүр-Дарма, Ирдынеев Юрий, Манжигеев Сергей зэргэ зүблэлтын үеын буряад уран зохёолшо, ирагуу найрагшадай зохёоһон, мүнөө болоходо мартагдад гэһэн хүүгэдэй дуунууд багтаха.
Мүн 1960-90-ээд оной хүүгэдэй хит-дуунһаа гадна буряад арадай дуун болоод оршон үеын хүгжэмэй зохёолшодой дуунууд гүйсэдхэгдэхэ юм.
Арадай хуралай гэшүүн Семенов Бата урилдаанда хабаадагшадые амаршалжа, иимэрхүү урилдаан саашада боложо байха гэжэ хэлэбэ.
- Эндэ сугларһан бүхы зониие, баталамжа абаашадыешье, баярай бэшэгтэ хүртэгшэдыешье амаршалая. Буряад хэлэнэй һалбарида эдэбхитэйгээр ажаллажа, юумэ хэхэ бүтээхээ һанаһан хүнүүд бии гэжэ хэлэхэ байнаб. Иимэрхүү түһэлнүүдые, олониитын байгуулгануудтаяа хамтаран, саашадаашье дэмжэжэ байхабди гэжэ найданаб.