Улаан-Үдэ хотын һунгамалнуудай зүблэлэй барилгын болон газар эдлэлгын хорооной һунгамалнууд тусхай 3-н газарта хүрэжэ шухала асуудалнуудтай танилсаба. Хотын 105-дахи микрорайодо хэгдэжэ байгаа барилга дорохи газарнуудай шэглэлыень һэлгэхэ тухай хэрэг гараба. Тэрэ газарта хуулиин ёһоор 4-н дабхартай гэрнүүдые бариха эрхэтэй. Харин 5-н дабхаратай гэрнүүдые барихын тула газарай үнэмшэлгэдэ һэлгэлтэ, нэмэлтэ оруулагдаха зэргэтэй юм. Үшөө тиихэдэ Забайкальский һууринай ажаһуугшадай амарха, сэнгэхэ парк байгуулхада, Таёжный тосхоной ажаһуугшадай эзэлжэ һууһан газарай үнэмшэлгэ ондоо болгохо гэжэ хэлсэнэ.
-Мүнөөдэрэй байдалаар тус барилгын газар Ж-2 гэһэн зэргэтэй. Харин 5-н дабхартай гэрнүүдые барихын тула Ж-3 гэһэн зэргэдэ энэ газарнуудаа оруулха хэрэгтэй, — гэжэ Улаан-Үдэ хотын захиргаанай архитектура болон хотын барилгын талаар хорооной түрүүлэгшэ Михаил Мясищев хэлэбэ.
Барилгын эмхиин бүхы хэрэгтэй саарһа дансануудаа тушааһанайнь удаа газарай үнэмшэлгын һэлгэлтэ хэгдэжэ эхилхэ. Хотын захиргаанай хорооной мэргэжэлтэдэй, һунгамалнуудай һайнаар хүдэлһэнэй ашаар энэ хэрэг ябуулагдана.
Гэхэтэй хамта Забайкальский һууринда амаралгын газар яаха аргагүй хэрэгтэй. Тэндэ тусхай түхеэрэлгэнүүд үгы байбашье таатай зохид оршон тойронхитой. Байдын булаг гэжэ нэрлэгдэһэн горхон дээгүүрхи хүүргэнь һалажа, хүнэй гарахань аймшагтай болонхой. Мүнөө байгаа Р-1 гэһэн газарай түхэл эндэ амаралгын газар түхеэрхэдэнь тааруу гэжэ элирээ.
-Ажаһуугшад эблэржэ грант бэшээд тэрэнээ эльгээгээбди. Хэрэгтэй бүхы саарһануудыень бэлдээбди. Хэр бэеэ энэ грант шүүжэ шадаа бол барилгын ажалнууд ерэхэ жэлдэ эхилхээр хараалагдана, — гэжэ һунгамал Геннадий Бадмаев хэлэнэ.
Таёжный һууринай ажаһуугшад, тусхай үнэмшэлгэгүй газарта гэрээ бариһанайхи, саарһа дансаяа бүтээжэ шаданагүй. Тэрэ газартань түсэбэй ёһоор үйлсэ, харгы байха ёһотой байгаа. Хүнэй гэр байра задалжа байнгүйгөөр, газарайнь үнэмшэлгэ һэлгэхэ гэжэ һунгамалнууд шиидэбэ. Бүхы энэ 3-н газарнуудта хүрэжэ хараад, һунгамалнууд, хотын захиргаанай мэргэжэлтэд һайн тээшэнь асуудал шиидхэбэд.
-105 микрорайондо барилга хэгдэжэ байна. Тиимэһээ түргэн сагай туршада энэ асуудал шиидхэхэ хэрэгтэй. Нүгөө хоёр газарта мүн лэ ажаһуугшадай тала хараабди. Нүүдэл суглаанда прокуратурын ажалшад хабаадахадаа бүхы юумэ бэшэжэ абаад дансалаа, — гэжэ хорооной түрүүлэгшэ Василий Цыремпилов дуулгана
