Буряад Уласай Сэлэнгэ аймагай "Ольга Зубакова" хубиин хэрэг эрхилэгшэ "Шубуунай хашаадаа" үндэгэлэгшэ тахяагай тоо толгойень 3-һаа 20 мянга болгожо байна. Фермерэй ажал эрхилһэн эдэ зон 2012 ондо "Шэнэ фермерэй дэмжэлгэ" гэһэн хүтэлбэриин дагуу 1,5 сая шахуу түхэригэй грант шүүбэ. "Сэлэнгэ аймаг" ОНБ*-ын захиргаанһаа газар хүлһэлүүлжэ, хуушан ҺБФ**-ын һандаржа дууһахаа байһан байшангые шубуунай хашаа болгон заһан һэльбэжэ, шэнгэлигэй автомат түхеэрэмжэ (хуушые), мүн "Белореченское" ХА НХХ***-һаа 3,1 мянган үндэгэлэгшэ тахяа абажа үгэһэн байна гэжэ Буряад Уласай юрэнхылэгшэ Вячеслав Наговицынай Сэлэнгэ аймаг руу ажалай айлшалал хэһэнэй үрэ дүн болгон UlanMedia МА-ай һурбалжалагша мэдээсэнэ.
Албан ёһоор "Шубуунай хашаа" 2011 оной 12 һарын 16-нда ажаллажа эхилһэн юм. Хубидаа шубуу үдхэхые энэ айлайхин 2008 онһоо нааша эрхилһээр байгаа.
- Тахяа үндэгэлһэнэй үглөөдэрынь үндэгэниинь худалдаанда гараад байдаг гээшэ. Ерээдүйдэ яахаяа түлэблэжэл байгаа бэзэбди. Мүнөө ажаллажа эхилээд, гүрэнэй талаһаа тэдхэхэ гэжэ найданабди. Гүрэнэй тэдхэлгэһээ хамаг юумэн дулдыдаха бшүү. Хойто жэлһээ хюруул шубуунай мяха бэлэдхэжэ үзэхэ һанаан байна. Һанаан гээшэмнай гоё юм ааб даа. Бодотой юумэн болохо бэзэ гэжэ найдая. Мүнөө хуушан цехтэ гурбан мянган толгой тахяа байна. дээрэһээнь 20 мянган толгой тахяа хүлеэн абахаар бэлэн болонхойбди. Мүнгынь түлэжэрхинхэй, үглөөдэр ошожо абаад, нүгөөдэр цехтэ асаржа байршуулхамнай гэжэ Ольга Зубакова хөөрэнэ.
Бүтээгдэхүүнээ худалдахада балай хүндэ бэшэ. Ольга Зубаковагай хэлэһээр мүнөө үйлэдбэринь хэды дахин ехэ болохонь. Хэды хоноод тахяагай тоо толгойнь 3-һаа 20 мянган болохоо байна.
- Эгээ гол юумэниинь гэбэл, ажаллахал хэрэгтэй. Нэрээ суурхуулха ёһотойбди. Мэдээжын хэрэг эхилжэ байгаа хадаа рекламын мүнгэн гэжэ багашаг юм аабза. Хүдэлхэл хэрэгтэй. Эндэ тэндэ ябажа, бүтээгдэхүүнээ дурадхаа һаа, хүн абахаар байна. Улаан-Үдэдэ бүтээгдэхүүнииемнай худалдадаг дэлгүүрнүүд бии. Өөһэдөө зөөхэ гэхэдэ мүнөө дээрээ аргамнай үгы, тиимэһээ өөһэдөө ерэжэ абаашадаг. Хүн зон шэнэ үндэгэнэй амта мэдэхэдээ, хэрэгсээн гэжэ юумэн бии болоод, үндэгэ абахаяа наашаашье ерэхэ жэшээтэй гэжэ хубиин хэрэг эрхилэгшэ үзэнэ.
Шубуунай үйлэдбэриин бүтээгдэхүүн Буряад Улас даяар түхөөгдэхэ.
- Холын аймагууд руу зөөхэдэ хүндэшэг лэ байха юм ааб даа, тиимэ хадань түрүүшэгээр Сэлэнгэ, Хяагта аймагууд, Улаан-Үдэ руул зөөхэбди гэжэ Зубкова хэлэбэ.
*Орон нютагай байгуулга — муниципальное образование
**Һүн бүтээгдэхүүнэй фермэ — молочно-товарная ферма
***Хүдөө ажахын Нээлтэтэй хубисаата хамжаан — Сельскохозяйственное Открытое Акционерное Общество
