Буряад Уласта һаяхана үнгэрэгдэһэн һунгалтын удаа хотын зүблэлэй долоон һунгамал Арадай Хуралда һууритай болобо. Шэнээр эмхидхэгдэһэн һунгалтада илаһан хүнүүд тэдэнэй зарим һууринуудые эзэлхэ. Зүблэлэй түрүүлэгшэ Чимит Бальжинимаевай тэмдэглэһээр, үшөө бэелүүлэгдээгүй һунгагшадай хүсэл захяанууд хүсэд бүтээгдэхэ. Иигэжэ UlanMedia (УланМедиа) мэдээсэнэ.
— Сентябриин 10-да Буряад Уласай ажаһуугшад Арадай Хуралай һунгамалнуудые шэлэн абаба. Уридшалан үгтэһэн мэдээсэлээр, манай хотын зүблэлэй 7 нүхэд тиишээ һунгагдаа. Табан хүн нэгэ мандаттай округоор, үшөө хоёр хүн ниигэмэй бүридэлөөр. Мүнөө үедэ һунгалтын комиссиин хуулита тоо баримтануудые хүлеэжэ байнабди, — гэжэ Чимит Бальжинимаев хэлэнэ.
Вадим Бредний, Елена Вахрушкинова, Долгор Норбоева, Саян Бальжиров, Геннадий Бадмаев, Анатолий Сахнов болон Денис Гармаев гэгшэд Арадай Хуралай һунгамалнууд боложо шадаһан байна. Хотын зүблэлэй гуримаар, эдэ бүгэдэ өөрын дураар һуурияа орхиһон тухай мэдүүлгэ бэшэхэ ёһотой. Ганса Геннадий Бадмаев иимэ мэдүүлгэ оруулаад байна. Сентябриин 27-до үнгэрэгдэхэ сессии дээрэ тэдэниие болюулха тухай асуудал табигдаха.
Хотын зүблэлэй түрүүлэгшын орлогшо Анатолий Белоусовой тэмдэглэһээр, хотын зүблэлһөө гаража ошоһон һунгамалнууд Арадай Хуралда Улаан-Үдынгөө бэрхэшээлтэ асуудалнуудые ехээр бодхоохо гээд һанагдана. Тиигэжэ уласай бюджедһээ һомологдохо мүнгэн дээшэлхэ.
Хотын зүблэлэй хороонууд жэлэй эхиндэ табигдаһан түсэбөөрөө хүдэлхэ, хороонуудай түрүүлэгшэнэр болон тэдэнэй орлогшонор шэнээр дэмжүүлэгдэхэ. Округ бүхэндэнь ажал үргэлжэлүүлэгдэн, ажаһуугшадай захяанууд бүхыгөөрөө бэелүүлэгдэхэ гэжэ хотын зүблэлдэ найдуулна.
Улаан-Үдын һунгамалнууд мүнөө жэл хэзээ хэзээнэйхиһээ олоор Арадай Хуралда һунгагдаба. Тиимэһээ хотынгоо шиидхэгдээгүй асуудалнуудые хамтаран шиидхэхээр хараалагданхай.
— 2019 ондо Улаан-Үдэ хотын һунгамалнуудай зүблэлэй һая болоһон һунгамалнууд Арадай Хуралай аха нүхэдөөрөө уулзажа, танилсаа бэлэй. Тэрээнһээ хойшо хамтын хүсөөр шухала асуудалнууд шиидхэгдэдэг болонхой. Мүнөөшье бүри дүтэ болоходо, Улаан-Үдэ хотомнай хүгжэн һалбархал, — гэжэ Чимит Бальжинимаев хэлэнэ.
