Буряадай ниислэлдэ хотын һунгамалнуудай зүблэлэй ээлжээтэ 44-дэхи сесси ажалаа үнгэргэбэ. Арадай һунгамалнууд арад зондо хэрэгтэй шухала шиидхэбэринүүдые абаһан байна. Хажуугаарнь, Арадай Хуралда һунгагдаһан нүхэдөө үдэшэһэн байна. Энээн тухай UlanMedia (УланМедиа) дуулгана.
Зунай амаралтын удаа һунгамалнууд ажалдаа бусажа, намарай түрүүшынгээ суглаанда 26 асуудал хараһан байна. Энэ сессидэ Улаан-Үдэ хотын мэр Игорь Шутенковай хабаадаһаниинь удхатай гэжэ хэлэхээр. Буряад Уласай Арадай Хуралай шэнэ һунгамалнууд Геннадий Бадмаев, Саян Бальжиров, Вадим Бредний, Елена Вахрушкинова, Денис Гармаев, Долгор Норбоева болон Анатолий Сахнов гэгшэд һаяхана хотын һунгамалнуудай зүблэлдэ хүдэлжэ байгаа бэлэй гээд һануулая. Энэ үдэр тэдэ ерэжэ, тушаалһаа болюулха тухай мэдүүлгэнүүдые үгөө. Хэды тиигэбэшье, тэдэ нягта харилсаа холбоотойгоор ажалаа ябуулжа, түрэл хотоёо һайжаруулжа байхаар түсэблэнэбди гэжэ Вадим Бредний найдуулаа.
— Хотын һунгамалнуудай зүблэл бултыетнай хүлеэн абахабди. Маанадтайгаа хамта хотынгоо ажаһуугшадай бэрхэшээлнүүдые зүбөөр шиидхэжэ байхабди, — гэжэ зүблэлэй түрүүлэгшэ Чимит Бальжинимаев тэмдэглээ.
Энэ ушарһаа боложо, хотын зүблэлэй хороонууд хүтэлбэрилэгшэдгүй үлэшөө. Тиимэһээ үлэһэн һунгамалнууд сооһоо шэнэ тушаалтан элирүүлэгдэбэ. Мүнгэн һангай болон экономическэ асуудалнуудай талаар хорооной түрүүлэгшээр Дмитрий Путилин томилогдоо. Ниигэмэй бодолгын хороониие Денис Егоров ударидаба.
— Ехэ харюусалгатай тушаалда намда найдажа томилһондотной баяртайб. Бүхы хүсэ шадалаа гаргахаб, ажаһуугшадай аша туһын түлөө хүдэлхөөр бэлэнби, һайн арга боломжо бэдэрхэб, — гэжэ Денис Егоров баяртайгаар хэлээ.
Сагань утадхагдаа
Һүүлэй хэдэн жэлдэ Улаан-Үдэдэ унаа һэлгэлгын тариф нэбтэрүүлэгдэжэ эхилэнхэй. Тэрээнэй болзор 1 час байһанаа 1 час 30 минута болгогдобо. Энээн тухай ажаһуугшад һунгамалнуудта хандаһан байна.
— Түрүүн тарифай саг 40 минута байһан юм. Удаань 1 час болгогдоо һэн. Харин мүнөө энээниие 1 час 30 минута болгообди. Манай үйлсэдэ һүүлэй үедэ автоунагай тоо эрид дээшэлнэ. Хажуугаарнь, олон харгы дээрэ бидэ заһабарилга ябуулнабди. Тиимэһээ хотын транспортын ябадал удаан болоно. Хүн зон тариф хэрэглэжэ үрдихын түлөө иимэ алхам хэгдээ, — гэжэ хотын зүблэлэй хорооной түрүүлэгшэ Сергей Бурдиков тэмдэглээ.
Хотын автобусоор ябаһан хүн харгынгаа түлбэри заал һаа банковска картаар түлижэ, өөрын хэрэгтэй трамвайн буудал хүрөөд, саашаа харгыгаа үргэлжэлүүлхэ аргатай. Трамвай соогоо баһа картаараа түлэхэ болоно. Энэ ушарта автобусой түлөө 30 түхэриг дарагдаха, харин трамвайн түлөө мүнгэн абтахагүй. Урид трамвайгаар ябаад, автобусто һуухадаа баһа ганса 30 түхэриг гаргашалхат гэжэ “Городские маршруты” эмхидэ мэдүүлнэ.
Нюур тала нэгэ шэнжээр
Удангүй Улаан-Үдэ хотын түб мүнөө үеын сагта таарамаар һэльбэн шэнэлэгдэхэнь. Автоунаануудай байха зогсолтонууд түбтэ үсөөн. Шэнээр бодхоогдохо газарнуудта иимэ зогсолтонууд хүсэд байха гээд хотын захиргаанда найдуулна. Тиимэһээ автовокзалай хажууда олон дабхар парковка баригдахаар түсэблэгдэнхэй. Харин олон дабхарта гэрнүүдэй доро парковка ехээр баригдахагүй. Юуб гэхэдэ, эндэ газар дороһоо уһан ехээр гарадаг гээшэ. Энээн тухай Сергей Бурдиков мэдүүлбэ.
Шэнээр бодхоогдоһон гэр байрануудай нюур шарай нэгэ адли шэнжэтэй байха ёһотой. Энээн тухай тусхай шиидхэбэри сессиин үедэ абтаба. Иигэжэ архитектурна шанар шэнжэ хүн зоной нюдые баярлуулха ёһотой. Эндэ ганса нюур шарайн үнгэ хараада абтана бэшэ, мүн ямар барилгын хэрэгсэлээр бүтээгдэнэб гэжэ ойлгохо хэрэгтэй. Шэнэ гэрнүүдэй орохо-гараха үүдэн, гэшхүүрнүүд, гэр соо нээгдэхэ эдеэ хоолой газарнууд, магазинууд нэгэ адли байха ёһотой.
— Манай уласта федеральна һанһаа ямар ехэ мүнгэн һомологдоноб гэжэ булта харанабди. Энэ зөөрёор хотымнай нюур шарай һайжарха, нэгэ стандартаар хэгдэхэ ёһотой гээд һанагдана. Тиимэһээ олзын хэрэг эрхилэгшэдтэй эртэхэнээр харилсаа холбожо, барилгын түсэблэлгын үедэ энээн тухай хэлсээн баталагдабал һайн байгаа, — гэжэ Чимит Бальжинимаев хэлэнэ
