Зарим оронһоо хүнэһэнэй бүтээгдэхүүниие оруулхада хориг табигдаад байна гээшэ. Мүнөөнэй иимэ байдалда Байгал далай болоод Буряад ороной бусад дотоодо уһа голдо загаһа үйлэдбэрилхые анхаран үзэхэ саг тулажа ерээд байна гэжэ Буряад Уласай юрэнхылэгшэ Вячеслав Наговицын хэблэлэй бага хурал дээрэ хэлэһэн байна. Мүн тус һалбариие холбооной уласай түсэбһөө зохихо хэмжээгээр һанхүүжүүлбэл, загаһа бариха хэмжээе хэды арбаад дахин ехэ болгохоор гэжэ хэлээ.
— Байгал далайн загаһанай тэнсэбэриин хадгалан хамгаалхын тула 47,5 сая түхэриг хэрэгтэй. Энэ хадаа бүхы гүрэнэй хэмжээндэ тон бага мүнгэн. Энэ мүнгые гансал Холбооной уласһаа гаргуулхаар. Мүнөө дээрээ 19 сая түхэриг лэ гаргашалагдана. Иихэдээ зорюутаар бүхэли бүхэн һалбариие үгы болгожо байна гэжэ ойлгожо болохо. Юундэб гэхэдэ загаһанай үсөөрхэдэ, загаһа бариха хуби хэмжээ багасаха болоно гээшэнь эли. Тиимэһээ дам саашаа загаһанай үйлэдбэри үсөөржэ, загаһа үдхэдэг үйлэдбэри бүришье үсөөн болохо. Энэ болбол тон буруу юумэн. Яахаяа тиинэб? Ойлгоногүйб гэжэ Вячеслав Наговицын хэлэбэ.
Буряад Уласай юрэнхылэгшын хэлэһэнээр БУ-ай засагай зүгһөө загаһа бариха хуби хэмжээе мүнгэтэ болгохо гэһэн һанал оруулһан байна. Мүн адли һаналые загаһашадшье өөһэдөө дэбшүүлэгшэ бэлэй.
— Гэбэшье мүнөө дээрэ хуби хэмжээ худалдан абахашье талаар, жэл бүри үйлэдбэрилэн гаргаха ёһотой жараахайн тоо толгойе хангахаар холбооной уласай һанхүүжүүлтыншье талаар тодорхой шиидбэри гаргаагүй байна. Дайнай үедэ 10 мянган тонно загаһа баридаг байһан аад, мүнөө 700 лэ тонно баринабди.
