"Робокар Поли" хүүхэлдэйн киное буряад хэлэндэ оршуулжа харуулхань. Буряад хэлэ дэлгэрүүлхэ грантын урилдаанай "Аудио-видео түһэл" гэһэн һалбарида түрүү байра эзэлһэн Цыбенова Эрженэдэ 50 мянган түхэригэй баталамжа гардуулба гэжэ UlanMedia мэдээсэлэй агентлигай һурбалжалагша бэешэлэн мэдээсэнэ.
Түһэлэй зохёогшод "Робокар поли" хүүхэлдэйн киногой зохёогшын эрхэ эзэмшэгшэдтэй болон Ородой Холбооной Уласай нютаг дэбисхэртэ тус брэндые харюусаха Ородой лицензиин агентлигтай холбоо барижа, тус хүүхэлдэйн киное буряад хэлээр оршуулжа, дуу оруулха зүбшөөрэл абажа шадаа.
Буряад хэлээр гараха "Робокар Поли" хүүхэлдэйн киное албан ёһоор Youtube дээрэ гаргажа харуулха болоно. Иигэһэнээр хүүгэдүүдтэ буряад хэлэ үзэхэ урма зориг хайрлахань дамжаггүй.
"Робокар Поли" хүүхэлдэйн кино дэлхэй ниитэдэ дэлгэрһэн хадаа хүүгэдтээ буряад хэлэ заахаа һанаһан аба эжынэрэй бишыхан үхибүүдтэнь тон ехээр һайхашаагдаха гэжэ һанагдана.
Бүһэ нютагай олониитын байгуулга "Найдал" жасын ударидаха зүблэлэй түрүүлэгшэ Балханов Юрий буряад хэлээр дуу оруулһан хүүхэлдэйн киное үхибүүд нэгэ хэды һара болоод хараха аргатай болохо гэжэ хэлэбэ.
- Түһэлэй зохёогшод тус хүүхэлдэйн киногой 12 ангииень оршууланхай, бэлэн болгоод байна. Гол юумэниинь гэхэдэ зохёогшын эрхэ эзэмшэгшэдһээ зүбшөөрэл олоһон байна. Тиихэдээ хахад жэл болоод буряадаар амилһан хүүхэлдэйн кино харабди гэжэ һананаб гэжэ Балханов Юрий этигэл түгэс хэлэбэ.
