Апрелиин 13-да Улаан-Yдэ хотын Ⴙунгамалнуудай зүблэлэй Нютагай байгууламжын, хуулиин эрхэнүүдые хамгаалгын хороон нүүмэл зүблѳѳ үнгэргѳѳ. Улаан-Yдэдэ харгын бэрхэшээлтэ участогууд үргэлжэ шалгагдажа, бүридхэгдэжэ байдаг юм. Буряадай ниислэлэй ажаhуугшадай энэ талаар мэдүүлгэнүүдые, заргануудые засаг баригшад шууд хараадаа абаажа, шиидхэхэеэ оролдодог. Мүнѳѳдэр, апрелиин 13-да Улаан-Yдэ хотын Ⴙунгамалнуудай зүблэлэй Нютагай байгууламжын, хуулиин эрхэнүүдые хамгаалгын хороон нүүмэл зүблѳѳ үнгэргѳѳ. Тэрээндэнь оролсоhон УланМедиа-гай (UlanMedia) сурбалжалагша харгын бэрхэшээлтэ 3 участогуудтай танилсаад ерээ.
Мокровой болон Тепловойн гудамжануудые холбоhон бэрхэшээлтэ бэлшэр — шалгалтын түрүүшын пункт боложо үгѳѳ. Тэндэ үргэлжэ авто-унаанууд тогтошодог, мүргэлдэхэеэ hанадаг юм. Харгын аюултай байдалай гол шалтагаан болоошьегүй hаа, ерээдүйдэ эндэхи байдал бүри доройтохоор хараалагдана гээд, Улаан-Yдын захиргаанай унаа тээбэринүүдые мэдэлдээ абаhан хорооной таhагые даагша Сергей Чистяков тэмдэглэбэ.
"Энэ бэрхэшээл гансата бии болошоо бэшэ — урда жэлнүүдтэ байгаа ха юм. Улаан-Yдын урда зүг руу хараhан оршон байдалые болбосон түхэлтэй болгохо тухай мастер-план мүнѳѳдэрэй энэ бэрхэшээл шиидхэхэ аргатай. Тиишээ тармвайнууд ябажа эхилхэ ха юм. 9,8 модо зайда трамвайн зам татагдахаар түсэблэгдэнэ. Тиигэhэнэй ашаар энэ бэлшэр бүhэлhэн тойруу харгын ашаар хүнгэрхэ юм. Мүнѳѳ дээрээ энэ талаар ажал ябуулагдажа байна. Байгша ондо энэ мастер-план хамгаалагдаад, hаяын 2 жэлэй турша соо ехэ барилга эхилжэ, энэ бэлшэрэй асуудал одоошье шиидхэгдэхэ", — гээд, Сергей Чистяков тэмдэглэнэ.
Харгын энэ бэрхэшээлтэ участок анха түрүүшынхиеэ засаг түрын онсо анхарал татанангүй. Эндэ светофор, бэржэгэр хэмэл харгы тодхохо тухай хараалагдаhан. Теэд эдэ бүгэдые табихын яашье аргагүй байгаа. Тиимэhээ мастер-план бэелүүлжэ эхилтэр ГИБДД-гэй шанга харуул хэрэгтэй. Харгын аюулгые хиналгын албан ойлгууламжын ехэ ажал ябуулжа, бэлшэрэй байдалые хинан хаража, шалгажа байха болоно.
Харгын гансал тээ аюул болоно бэшэ. Дээрэ дурдаhан харгын бэлшэр ерээдүйдэ ехэ аюултай боложо магадгүй hаа, Светлый тосхон руу дээшээ үгсэhэн харгыда үргэлжэ унаанууд мүргэлдэжэ байдаг болонхой. Асфальт хушалтагүй энэ харгыгаар авто-унаанууд гүйдэл дундаа гол зам руу тулан буухадаа, али нэгэнтэй "золголдодог" онсотой.
Энэ бэрхэшээл шиидхэхын тулада бэгжэгэр харгынуудые тодхожо, ёhотой (худал бэшэ) камерануудые үлгэхэ тухай шиидхэбэри абтаа. Тиихэдэ доошолhон харгын хажуудахи тэмдэг харгын дүримэй ёhоор болгогдохо, мүн асфальт шорой шонхорhоо ходо сэбэрлэгдэжэ байха юм.
"Светлый тосхонhоо зурыhан харгы хиналта доро абтажа, харгын шэнэ тэмдэг тохогдохо, үргэлжэ харгын шорой шонхор арилгагдажа байха, харин бэгжэгэр харгы табиhан газарта тэмдэгынь шэнэлэгдэхэ, дээшэнь үргэгдэхэ. Эдэ бүгэдэ ажалнууд энэ жэлдэ хэгдэхэ", — гээд, Дмитрий Турченюк, Улаан-Yдын Зүблэлэй Нютагай байгууламжын, хуулиин эрхэнүүдые хамгаалгын хороонлй түрүүлэгшэ мэдүүлбэ. .
Yшѳѳ нэгэ участок бүри ехэ орёо байдалтай. Забайкальский тосхоной Совхозный гудамжын харгын нэгэ таладань буудал үгы юм. Харгын алишье тээ зогсоод, автобусууд хүнүүдые hуулгана. Тиихэдэ хүндэлэн гарахаар тусхай газар зохёогдоотой бэшэ. Тиимэhээ тосхоной ажаhуугшад дуратай газартаа харгы хүндэлэн гаража, буудалда хүрэтэрѳѳ аюулда орожо магадгүй бшуу.
Тус тосхонhоо эхиеэ абаhан хотын харгынуудые заhабарилгын хэмжээн соо подрядчигтай уулзажа, буудалай хоёр хармаан хаана хэгдэхэ тухай зүбшэн хэлсэгдэхэ юм. Нэгэнь түшэхэ ханатайгаар хэгдэхэ, гадна харгы хүндэлэн гараха тусхай газар байгуулагдаха юм. Эндэхи ажаhуугшадай хараагаар харгы гэрэлтүүлэгдэхэ, бэгжэгэр харгынууд нэмэгдэхэ.
Энэ нүүмэл зүблѳѳнэй дүнгүүдээр, харгын бэрхэшээлтэ газарнууд бүри ехэ хараада абтажа, улад зоной аюулгүй байдал сахиха талаар хэмжээнүүд хэгдэхэ юм.
