Хотын һунгамалнуудай зүблэлэй 43-дэхи сесси Улаан-Үдэдэ ажалаа түгэсэбэ. Дүнгүүдтэйнь танилсуулхамнай.
Һунгамалнуудай зүблэлэй түрүүлэгшэ Чимит Бальжинимаевай тэмдэглэһээр, һунгамалнууд үрэ дүнтэйгөөр хүдэлбэ. Тиигэжэ сессин үедэ 9 шиидхэбэри абтаа. Эдэ асуудалнууд хороон бүхэндэ урид хэлсэгдэһэн байгаа. Тиимэһээ түргөөр харагдаа.
Зүблэлэй урдахи шиидхэбэринүүдтэ заһабари хубилалтанууд ехэнхи ушарта техническэ талаар оруулагдаа. Хотын ажабайдалай гол талануудые хараалһан шиидхэбэринүүд абтаа. Заншалта ёһоороо, тус сессидэ Улаан-Үдэ хотын мэр Игорь Шутенков болон прокуратурын албатад хабаадалсаа.
Коммунальна ажахы һайжаруулха тухай түсэбтэ хубилалтануудые оруулха тухай хотын ажахын хорооной түрүүлэгшэ Сергей Гашев хөөрэжэ үгөө. Финансын талаар хорооной түрүүлэгшын уялгануудые дүүргэгшэ Жаргал Будаев Улаан-Үдэдэ газарай түлөө налог татабарие эршэдүүлхэ тухай мэдүүлээ. Ушар гэхэдэ, Улаан-Үдэдэ коммунальна ажахын комплексно хүгжэлтын программа 2035 он хүрэтэр нэбтэрүүлэгдэнэ гээд һануулая.
Зүблэлэй түрүүлэгшын орлогшо Анатолий Белоусов арад зоной захяанууд тухай элидхэл хээ. 18 тойрогуудаар һунгагшадтай захяануудта нэмэлтэнүүд оруулагдаа. Тиимэһээ 2023 ондо захяануудые дүүргэхэ талаар түсэлнүүдтэ 120 сая түхэриг һомологдоно гээшэ.
Зүблэлэй бюджэдэй хорооной түрүүлэгшэ Долгор Норбоева баяртай мэдээсэл дуулгаба. Түбэй рыногой дэргэдэхи транспортые ондо ондоо тээшэнь шэглүүлхэ хүүргэ барилгада абтаһан кредит уласай бюджэдтэ хүсэд бусаагдааба. Тэрэ 2008 ондо ашаглалда тушаагдаа бэлэй.
Улаан-Үдэ хотын захиргаанай доторой байгууламжанууд, зүблэлэй хороонууд өөр тухай мэдээсэлнүүдые “Вконтакте” (12+), “Одноклассники” (12+) гэһэн социальна сүүлжэнүүдтэ табиха ёһотой гэжэ зүблэлэй түрүүлэгшэ Чимит Бальжинимаев һануулаа. Иимэ Хуули 2022 оной декабрь соо абтаһан юм.
— Арад зонтой нягта харилсаа холбоотойгоор ажал ябуулхада социальна сүүлжэнүүд бэлэн болгоно. Манай һунгамалнуудай зүблэлэй һунгамалнууд, хороонууд өөрын канал дээрэ ажаһуугшадтайгаа шиидхэбэринүүдээрээ хубаалдана. Мүн олондо мэдээсэл тараадаг хэрэгсэлнүүдһээ хүн зон мэдээсэл абана, — гэжэ Чимит Валерьевич хэлэнэ.
