Европын Холбооной оронууд, АНУ, Канада, Япон, Австралиһаа һү мяха, ногоо жэмэс оруулхые хориглоһониинь Буряадта хүнэһэнэй сэн дээшэлүүлхэ шалтаг болохо ёһогүй. Буряад Уласай Эдэй засагай яаманай мэдээсэһэн ёһоор Ород гүрэнэй эсэргүү хориг табиһан улас оронууд Буряадта оруулһан хүнэһэнэй 6%-ииень лэ хангана. Оруулһан хүнэһэнэй ехэнхинь архи дарһан, нарин бообо, жэмэс, һамар зэргэ болоно. Жэмэс ногооной сэнгынь европын импортын багасаһанһаа боложо ондоо болохогүй, юундэб гэхэдэ мүнөө худалдаанда байһан жэмэс ногоониинь ехэнхидээ ородой гү, хятадай юм гэжэ БУ-ай Эдэй засагай яаманай хэблэлэй албанай мэдээсэһые эшэлжэ, UlanMedia МА мэдээсэнэ.
______________
*Европын Холбоон — Европейский союз
**Америкын нэгэдэһэн улас — Соединенные штаты Америки
ЕХ-ной оронууд, АНУ, Австрали, Канада, Норвегиһоо оруулдаг хүнэһэн бүхэли жэлээр Буряадай худалдаанһаа үгы болохонь гэжэ һануулая. ОХУ-ай тогтоолой дагуу Ород гүрэндэ дээрэ нэрэ зааһан улас оронһоо үхэрэй, гахай, шубуунай мяхан, жэмэс ногоон, биһалаг, һүн, сагаан эдеэ оруулхые таһа хориглоһон байна. Энэ хадаа Баруунай оронуудай хориг табиһанай харюуда абаһан арга хэмжээ болоно.
Гайлиин албан ёһоной тоо баримтын ёһоор 2013 ондо Буряад Уласта 148 сая ам.долларай импортын бараа оруулһаниинь 2012 оной хэмжээнһээ 39% бага гэнэ. Дашарамда тэмдэглэхэдэ, Буряад Уласай импорт болбол голшолон хүрэнгэ оруулалтын шанартай. Импортын 65%-нь техник тоног түхеэрэмжэ, тээбэриин хэрэгсэл (ашаанай автомашина, зам барилгын техникэ, трактор), агаарай онгосын хүдэлгүүр гэхэ мэтэ юумэн болоно. Ондоогоор хэлэбэл, Буряад Уласта үйлэдбэрилдэггүй юумэн болоно.
Импортын ниитэ хэмжээнэй 17%-нь лэ эдихэ ууха юумэн болоно. 2013 оной дүнгөөр импортын хүнэһэ оруулхань урдахи жэлдээ ороходоо 6,2%-яар бага боложо, 30,4 сая ам. доллар болоһон байна. Хүнэһэ оруулдаг гол түншэ орон хадаа Хятад (55,4%) Монгол (16,2%) хоёр юм.
Һүн, сагаан эдеэн гэбэл, мүнөө дээрэ ехэнхииень орон нютагай болоод ОХУ-ай бусад бүһэ нютагай үйлэдэбэринүүд хангажа байна.
Мүнөө гахайн мяхые ехэбшэлэн нютагай үйлэдбэри хангана. Тахяагай мяхые Ангарскын шубуунай үйлэдбэри гү, үгы һаа Хятадһаа оруулжа байна. Тиимэһээ гахай, тахяагай мяханай сэндэ нөөхи хизаарлалтанууд ямаршье нүлөө үзүүлхэгүй.
Харин үхэрэй мяханай сэн нэгэ бага үндэр боложо магадгүй тула Ород гүрэнэй Засагай Газар энэ асуудалые Латин Америкаһаа хүнэһэ оруулжа шиидэхэ юм ха. Гэбэшье Буряадай засаг түрэ баригшад Буряад ороноо үхэрэй мяхаар бүрин хэмжээгээр өөһэдыгөө хангаха зорилго табигданхай.
БУ-ай Эдэй засагай яаманайхидай үзэһөөр, бараа бүтээгдэхүүн оруулхые хизаарлаһаниинь өөрын үйлэдбэри хүгжөөхэдэ нүхэсэл бүридүүлхэ юм.
